我前日晚上番咗嚟啦~~从童话世界番到城市,真係觉得好唔舍得,虽然呢几日真係好累好累,行到对脚都好似废咗咁,但係係值得嘅!

好似怪婴话斋,果度真係一世人要至少去一次先得,就好似你一世人要至少睇一次彩虹咁(呵呵,本人已经睇过啦~~)

先讲吓呢四日嘅行程啦~~

 

第一日:早上4点半起身,6点到去到机场,搭8点嘅机(我都唔明咁早去做乜~!) 坐咗两个钟去到成都,吃完中午饭係饭店开房训觉休息.再番机场搭3点嘅机去九黄机场~~好啦,去到目的地啦,一落机感觉极其清凉舒适,皆因果度气温只有17度,所以要即刻着上长袖衫以免冻亲啊~~跟住就搭两个钟车去九寨沟啦,间酒店都几好啊,设施几齐全,外观设计得好有特色,隔离仲有座古城,我相册度有得睇~~! 所以第一日就係係等飞机,搭飞机同搭车中度过啦~

 

第二日:早上7点就起身,吃完早餐之后就向九寨沟进发,之后成日就流连係呢个童话世界度啦~~因为九寨沟好大,所以我哋係搭专门嘅巴士同行路相结合,不过行路远比搭巴士多,哇,行到我哋一只嘢咁,好累好累啊,累到后尾见到D好靓嘅瀑布都无乜心情欣赏啦~而且人好多,影相都唔方便,不过我就认为去旅游呢,最重要嘅就係当时嘅心情同埋通过旅游获得嘅收获,并唔係只係为咗影相罗番屋企欣赏咖~  

净係睇相係唔够咖,因为睇相只係睇到相机可以影到嘅局部景观,你无置身于果个环境,你唔会感受到果种震撼,只有当你呼吸住果度清新嘅空气,望住广阔湛蓝嘅湖面,层层叠叠嘅林木,你先会从心入面真正产生对大自然嘅敬畏,先知咩嘢叫鬼斧神工啊

 

BTW,九寨沟最靓嘅时候係10月到11月,因为果阵满山遍野嘅树木都会係彩色,即是彩林,九寨五绝之一,其它四绝为:瀑布,雪山,翠海,藏羌歌舞

我觉得水係最靓嘅,又蓝,又清,深邃得嚟好纯净,相传"黄山归来不看山,九寨归来不看水,桂林山水甲天下,九寨山水胜桂林" 

 

循例讲句~果日一度都几晒咖,好彩我做足防护措施~~哈哈哈,果度係青藏高原一部分嚟咖,D紫外线唔係讲笑咖~!

 

第三日:早上8点起身,落床果阵对脚係咩嘢感觉相信都唔使我多讲啦,落楼梯咁个个都gut吓gut吓咁,变晒阿婆啊,呵呵

朝早比导游带去购物点购物~! 哎,参加旅行团係梗咖啦,当买吓手信咯~~

跟住中午上去黄龙吃完午饭就开始爬山啦,果度海拔都几高咖,3900米左右,虽然之前我去5000几嘅玉龙雪山都唔觉有太大高原反应,但係今次唔同,上落山都要靠自己行,足足要行8点几公里,所以我同阿妈买咗个氧气瓶,虽然后尾都无用晒~~

跟住嘅事大家都应该估到啦,前一日先行到傻吓傻吓咁,第二日仲要係高原爬山添,好鬼辛苦咖,阿妈爬咗2600米左右就关节痛上唔到啦,而我就唔想留下遗憾,因为山顶有最靓嘅五彩池,所以我好英勇咁继续前行~! 一个人行山嘅感觉都几爽咖,好似D探险者咁啊~!~呵呵

 

讲起黄龙D五彩池真係靓咯,一层一层咁,好奇妙,其形成机理大致係因为钙化形成,係喀斯特地貌,不过由于太多人,同埋因为"九寨归来不看水"嘅原因,就影得唔係好多相~

 

当晚原定8点飞机番成都咖~!点知部机延误咗3个钟~!!! 搞到我哋仲惊赶唔到飞机,净係係千辛万苦爬上去嘅山顶停留咗两三分钟! $^%#&%!@!@#$!  晚餐就係候机室吃机场补偿嘅饭盒咯~! 不过都唔係好差,而且都算係未试过嘅体验啊~~呵呵,结果番到成都安顿落嚟都成12点几了

 

第四日:成都一日游~~游览咗D类似祖庙嘅地方咯~~少无聊咁啦~~下午飞机又延误咗个几钟,搞到10点先番到屋企啊! 番到我认为係五星级的家真係舒服啊,第二日训到11点半先醒,实在太太太舒服啦`!~!~!~~~~~~~~~~~~

 

 

番到嚟之后!!竟然发现SPACE改咗版喔~! 我开始上仲以为中咗毒啊~! 个版面都唔好睇嘅,都係以前咁精致D,有气质D!!

仲有啊,点解我个SPACE上亲都话有错误咖~!~

 

讲咗好多啊~~~大家慢慢睇吓我嘅旅游感想,同欣赏吓D相啦~!~!~ 如果以后边个係秋天得闲,而我又得闲~~一起再去多次啊~